Сүүлийн үед зарим хэвлэл мэдээллийн хэрэгслээр Улаанбаатар хотын Токио хот дахь төлөөлөгчийн үйл ажиллагааны талаар ташаа мэдээлэл гарч байгаатай холбогдуулан дараах албан ёсны тайлбарыг хүргэж байна.
Нэг. Стратегийн түншлэл ба бодлогын залгамж чанар
Монгол Улс, Япон Улсын дипломат харилцааны түүхэнд үе үеийн хотын дарга нарын хүрч чадаагүй байсан Улаанбаатар, Токио хотуудын хамтын ажиллагааны шинэ түвшинд хүрч, Нийслэлийн Засаг дарга Х.Нямбаатар 2023 онд Токио хотын захирагч Ю.Койкэтэй Санамж бичиг байгуулснаар стратегийн шинэ түншлэлийн үндсийг баталгаажуулав. Энэхүү түншлэл нь Япон Улсын Олон улсын хамтын ажиллагааны байгууллага (JICA)-ын хөнгөлөлттэй зээл болон өндөр технологийн шийдлүүдийг нийслэл хотод нэвтрүүлэх бодлогын суурь болж байна.
Хоёр. Элчин сайдын яам болон Төлөөлөгчийн газрын чиг үүргийн ялгаа
Монгол Улсаас Япон Улсад суугаа Элчин сайдын яам нь хоёр улсын улс төр, дипломат харилцааг зангиддаг бол Төлөөлөгчийн газар нь Улаанбаатар хотын түгжрэл, хог хаягдал, хотын инженерчлэлийн асуудлыг Япон Улсын дэвшилтэт туршлагаар шийдвэрлэх, хот хоорондын шууд хамтын ажиллагааг (City-to-City) хэрэгжүүлэх ажил хэрэгч бүтэц юм.
Гурав. Гүйцэтгэлийн үр дүн (2023–2025) Төлөөлөгчийн газар нь хотын тулгамдсан асуудлыг шийдвэрлэх чиглэлд дараах бодит ажлуудыг хэрэгжүүлэв:
Нийтийн тээвэр ба Дэд бүтэц:
Токио хотын Тээврийн газрын (Toei Transportation) шинжээчдийн зөвлөмжөөр чиглэл төлөвлөлтийг сайжруулж, JICA-ийн хүрээнд техник нийлүүлэлтийн санхүүжилтийг тохиролцов. Мөн Чингис хаан олон улсын нисэх буудлаас Улаанбаатар хот руу чиглэсэн нийтийн тээврийн үйлчилгээг нэвтрүүлэх саналыг JICA-д албан ёсоор хүргүүлж, Улаанбаатар хотын метроны ТЭЗҮ-д суурилсан тендерийн баримт бичиг боловсруулах ажилд “Ниппон Коэй” (Nippon Koei Co., Ltd) ХХК-тай хамтран ажиллаж байна.
Хөрөнгө оруулалт ба Эдийн засаг:
“SushiTech Tokyo” болон “New Mongolia Forum” арга хэмжээний хүрээнд Япон Улсын 100 гаруй хөрөнгө оруулагчид “Хүннү” хотын төсөл болон ТЭЦ-5 төслийн танилцуулгыг хийж, 20 гаруй нүүр тулсан (B2B) уулзалт зохион байгуулав. Түүнчлэн Токио хотын Жижиг, дунд үйлдвэрийг дэмжих төв болон Улаанбаатар хотын Жижиг, дунд үйлдвэр, үйлчилгээг дэмжих төв хоорондын хамтын ажиллагааг эхлүүллээ.
Боловсрол ба Хүний нөөц:
Нийслэлийн 9 дүүргийн 45 багш, арга зүйчийг Токио хотын Сэтагаяа, Шибүяа дүүргүүдэд туршлага судлуулж, хүүхэд хамгаалал болон Япон Улсын “Үдийн хоол” хөтөлбөрийн арга зүйг 120 гаруй сургуульд танилцуулав.
Аюулгүй байдал:
Токио хотын гамшгийн үеийн бэлэн байдлын туршлагыг нийслэлийн Онцгой байдлын газрын 15 мэргэжилтэн газар дээр нь судалж, мэргэшив.
Дөрөв. Хариуцлага ба ил тод байдал
Төлөөлөгчийн газрын төсөв нь Шилэн дансны тухай хуулийн дагуу нээлттэй тайлагнагддаг бөгөөд төсвийн хэмнэлтийн горимын дагуу үйл ажиллагаагаа оновчтой зохион байгуулж, өдөр тутам ажил хэрэгчээр ажиллаж байна.
Улс орны гадаад нэр хүнд болон олон улсын хамтын ажиллагааны асуудалд хариуцлагатай хандаж хэвлэл мэдээллийн байгууллагуудыг баримтад тулгуурлан, мэргэжлийн ёс зүйтэй хандахыг уриалж байна.
Сэтгэгдэл бичих post